Күрэхпит муус устар ыйтан саҕаламмыта. Сахабыт сирин араас улуустарыттан биир дойдулаахтарбыт олус көхтөөхтүк кыттан, тэрийээччилэр астынныбыт. Дьокуускай, Уус-Алдан, Таатта, Муома, Ньурба, Майа, Нам уо.д.а сирдэртэн уопсайа холбоон 38 хоһоон киирдэ. Күрэхпитин дьүүллээтилэр:
1. Руфова Н.И. — СӨ Култууратын туйгуна, СӨ «Норуот айымньытын сайдыытыгар кылаатын иһин» бэлиэ хаһаайката, Тускул КК түмсүүлэр салайааччылара.
2. Мария Алексеева-Арылы Дуйдаах, СӨ суруйааччыларын сойууһун чилиэнэ, поэт, тылбаасчыт, кыраайы үөрэтээччи, Медицина Национальнай киинин Клиническэй киинин тэрийэр-методическэй үлэҕэ салаатын сэбиэдиссэйэ, СӨ доруобуйа харыстабылын туйгуна, СӨ култууратын туйгуна, Түүлээх нэһилиэгин бочуоттаах олохтооҕо.
3. Васильев И.А. — ССРС культуратын туйгуна, СР ырыа айааччыларын Союһун чилиэнэ, Түүлээх нэһилиэгин бочуоттаах олохтооҕо.
I миэстэ — Новгородова Людмила Андреевна, Муома. » *Туойабын эйиигин, Кылаайы».*
II миэстэ — Семенова Анна Ильинична, Түүлээх нэһилиэгэ. » *Махтал, бар дьоммор».*
III миэстэ — Винокурова Татьяна Ефремовна—Сабыйа, Үөһээ-Бүлүү, Маҥас. » *Байанай аартыга».*
Кыайыылаах Новгородова Л.А. тылларыгар, Рожина М.Я. матыыбыгар «Туойабын эйиигин, Кылаайы» — диэн ырыа сурэхтэннэ!
«Туойабын эйигин, Кылаайы!»
Биһигим ыйаммыт кырдала-
Нэлэмэн Алданым кытыла,
Чараҥым сэбирдэх суугуна-
Чугдаарар оҕо саас тускула.
Хос ырыа:
Туойабын эйигин, Кылаайы!
Сайда тур, уунэ тур сыл аайы!
Харахпар бу көстөр Сүөдүкэ,
Ыһыахтыы симэммит түһүлгэ,
Күн иилии оонньообут кустуга,
Күһүҥҥү айанньыт туллуга.
Кэрэ да ол кэмнэр ааспыттар,
Ырааппыт суол устун хаампатах.
Аар хатыҥ сипсиэрин анныгар
Чуумпуран дуоһуйа тыымматах.
Ахтабын дьүөгэбин,саҥаспын,
Суохтуубун эн кэрэ сирдэргин,
Дьэдьэннээх минньигэс салгыҥҥын,
Төрүт буор сымнаҕас кырыскын.
Кэпсэлгэ киирдиннэр дьонноруҥ,
Дьоһуннаах олохтоох ыалларыҥ,
Инники кэрдиискэ буоллуннар
Кэнчээри үтүөкэн ыччатыҥ!